Was ist dir bei einem Mann wichtig?

[Titali]

gOOd luck shmahu-sister

und bring mich nid uf dummi gedanke... back to the rOOts gäu!!!
verstoh dich meh als gnue und wenns dr märliprinz würd ghä, hätt nid jede immer so verdammt problem ihre partnerschaft *grummel*
meh isch halt würklech freier ohni sich ihre be-ziehig zfühle und cha sich doch meh sälbstverwürkleche... aber bin au der meinig, dass es mitemne partner ar siiite ou sött funktnioniere und wenn nid, de isches dr falsch... next one or enjoy to be free and yourself!

[Shmahu]

"back to the roots"...*vergrööl*...

ja, villicht klappts ja miteme partner a sinere siite...oder mit zwei oder drüü...

nei, im ernscht... ich wünsch der au vill glück schwöschterli...

may the long time sun shine upon you.
all love sourround you.
and the pure light within you guide your way on.

[Titali]

this or this or maybe this


*smile*

who knows! aber eis isch sicher, liebi chame sich nid ussueche, es passiert eifacht... follow your heart!!!

*LoVe*

[satropa]

Für mich ist bei einem Mann DIE EHRLICHKEIT das wichtigste.... kompromisslose Ehrlichkeit, die mir die Wahl überlässt, wie ich mich entscheide. Liebe darf nicht gefordert werden, Liebe darf nicht von Dingen abhängig sein, die Liebe ist, oder nicht. Das ist MEINE Wahrheit. Man muss sich wohl damit abfinden, dass nichts einen endlosen Bestand hat, den solange wir dinge von etwas abhängig machen, können sie verloren gehn. ...

Danke souris hast genau meinen Nerv getroffen.....Mehr gibt es aus meiner Sicht nicht zu sagen. Der Rest ergibt sich individuell.

PS. Also ich wart immer no uf min Märliprinz ..... au wenn ich scho paarmol erlebt han, wie sich de vermeintlichi Prinz nach em Kuss in e Frosch verwandelt het.. evtl. muässt ich mol es paar Frösch küsse...*iiiiiiiiick*

[Shmahu]

Theoretisch denke ich sollte es doch möglich sein, dass Mann und Frau sich "bedingungslos" lieben können... Praktisch ist das wohl kaum möglich.... Den es würde doch Voraussetzten, keinerlei erwartungen an den Partner zu haben.

Ist der Mensch fähig, zu lieben ohne zu erwarten? Können wir Lieben, ohne das die Liebe erwiedert wird?
Und ist es möglich einen Menschen zu lieben, ohne Ihn "festhalten" zu wollen?
Es wäre wohl wunderbar, eine solch "freie" Liebe zu erfahren, es wäre wohl grenzenlos, endlos... eine Liebe die Bestand hätte. Sie könnte nicht in Worte gefasst werden und aus einem Gefühl heraus entstehen, das völlig uneigennützig ist.

ich glaub, sone liebi isch möglich... aber nur, wännich si nöd ines "beziehigs-schema" drucke.. dänn fangt das ganze spiel mit de erwartige aa, dänn versuecht mer, de mänsch feschtzhalte.
ich versuech im momänt de maa, wo ich liebe, in erschter linie als wunderbare fründ azluege.. er hät en feschte und individuelle platz i mim läbe und i mim herz. de platz isch nöd ersetzbar, wie das bi beschte fründe nun mal so isch. da giz kei konkurränz, will mir jede mänsch i sinere einzigartigkeit öppis anders chan schänke.

au d liebi zume andere maa hät platz. au mis bedürfnis, dem andere maa körperlich nöcher zcho und mini sexualität uszläbe hät platz.. das isch es wunderbars gschänk.

umgekehrt versuechich genauso mich z freue, wänn die manne, wonich liebe, anderi fraue kännelerned.. es isch nöd immer eifach, ich känne d iifersucht sehr guet... aber es hilft mir immer wider, mich dra z erinnere, dass die mänsche in erschter linie mini fründe sind, wo frei i irere liebi und entwicklig sölled sii und dass ich dra glaube, dass wahri fründe sich im herz treu sind, egal was passiert.

ich bin no immer am üebe... aber für mich ischs im momänt die einzig möglichkeit, wahri liebi zläbe. villicht redi ime jahr wider andersch...

[ZWIEBACK]

...jaja euses Schmahu-lein Hi du...
Ja, wie du aschinend scho festgstellt hesch gids sid laaanger laaanger ziit sones bekannts Beziehigsschema, nämlich 1+1, was sich i eusere Gsellschaft duregsetzt und verankered hed. Warum eigentlich? Wills hald funktioniert... Für die meischte Mensche i eusere Gsellschaft (mich inkl.) isch das hald de eifachsti weg e beziehig z lebä.

Schmahulein, du bisch en spezielle Mensch, chanmer guet vorstelle, dass du was anders suechsch. Wenn du diini manne dezue findsch wo das mitmached und toleriered und selber villich au polygamiste sind und das toll finded, denn freuts mi umso meh für dich. Für mich wär das allerdings nüt...

Natürlich han au ich erwartige ane Liebesbeziehig. Und d Schmahu hed recht! S' isch nöd eifach, villich sogar unmöglich, 1 Person z finde wo all die erwartige chan erfülle. Aber das stört mich eigentlich garnöd... Die vorstellige und erwartige chömed hald vom Märliprinz/-prinzessin und mir läbed hald ide Realität und nöd imne märli. Muess mer denn immer alles ha? Chamer nöd au mal en kompromiss igah?

Was machsch denn wenn all dini träum, wünsch, erwartige usw erfüllt sind durch verschideni partner? Hesch denn würkli gnueg? bisch denn z fride? Mini erfahrig isch, dass gnueg nie gnueg isch. S erfülle vo allne erwartige weckt nur neui erwartige i dir und zwar nöd nur ufd liebi bezoge. Isch doch überall s gliich, das isch menschlich. S verhältnis vo erfüllte zu unerfüllte Erwartige, hoffnige und so bliibt doch immer etwa gliich. Das isch minere Meinig nah au de Grund wieso wohlhabendi Mensche nöd glücklicher sind als "armi". Ups, ich drifte langsam aber sicher vom thema ab... *ruder in andere richtung schwenk*

Ich persönlich bin en seeehr iversüchtige Mensch. Hans scho probiert z ändere, aber das isch eifacher gseid als gmacht. Drum wür ichs au nöd verträge wenn min Schatz no e anderi Liebesbeziehig nebed mir hetti. Also verzichte au ich gern uf mehreri partner. Villich bisch ja du nöd so iiversüchtig wie ich Schmahu oder du chasch besser demit umgah, weiss das nöd so gnau. Ich hoffe nur das dich nie i eine verknallsch wo so iversüchtig chan si wie ich, das chämti nöd guet

...Seisch mer denn in par Jahr obd immerno glücklich bisch mit dinere methode! Nimmt mi schono wunder!

liebs Grüessli usem schöne Höngg

[Shmahu]

hoi zwiebäckli... *liebevolltätschel*
das freut mich, dass du mir antwortisch..

du frögsch, ob mer immer alles mues ha... mini frag isch: wieso dänn nöd?

ich bin es wese wo körper und geischt vereint...de schmelzpunkt bezeichnich als mini seel... si bruucht nahrig us dene zwei bereich, damits ihre guet gaat und si chan liebi empfinde.

mer trifft also en mänsch.. us de geischtige verbundeheit und de körperliche aziehig entstaat liebi. das klappt villicht ein zwei jahr lang, es isch ja gnueg nahrig daa... aber irgendwänn wirds routine: zum biispiil hät mer hät di geischtig wält vom andere bis in letschte winkel erforscht und bringt kei neui erkänntnis meh; oder d liideschaft zwüsched de zwei körper, wo sich in und uswändig känned, verebbt. mer liebt sich zwar no, aber routine setzt ii, d seel und d liebi hungered.

dänn begägnet mer wider eme mänsch. de mänsch treit e ganz eigeni wält mit sich ume. mer brännt druff, si kännezlerne; entweder interessiert eim de geischtig horizont vom andere, mer will uf de gliiche wälle schwinge. oder mer möcht dem mänsch körperlich nöcher cho und d liideschaft uusläbe. oder beides.. d seel verlangt nach neuer nahrig.

das hat zwar alles überhaupt nüt mit em erschte partner ztue, aber trotzdem seit de: hey! du ghörsch mir! ich will nöd, dass du dini nahrig bi öpper anderem holsch, das kränkt mis ego und macht mer angscht... lieber will ich, dass du verhungerisch!

also zieht mer sich vo dere neue spannende wält zrugg... aber au vo de erschte, bekannte, will d seel gspüürt ganz genau, dass das eigentlich kei liebi isch, wo verhinderet, dass mer sich sälber neu entfaltet und entdeckt. di sexuell treui hät e vill wichtigeri treui im herz kaputtgmacht.
so vergönd d jahr... mer entfernt sich immer wiiter vonenand und bout e muur us wuet und vorwürf und enttüschig um sich ume... und entweder chunts irgendwänn zum groosse knall und mer trännt sich verbitteret vomene mänsch, wo eim ja eigentlich vill wür bedüütet.. oder mer stirbt innerlich ab und isch nüme fähig, würklichi liebi z empfinde.

was für es happy end!



okee, ich hans etz chli übertribe, ich gibs ja zue.. aber so ähnlich laufts doch mega oft ab, oder nöd? wänni so i de wält umelueg und all die verbitterete herz gsehn...

wämmer jetzt im szenario zrugggönd, nomal zum punkt, wo mer de neu mänsch trifft... und de partner seit (au wänns em weh macht): "hey, wänns dich im momänt glücklich macht, dänn verbring ganz vill ziit mit dem neue mänsch.. ich han kein grund zum weggaa, schliesslich liebed mir eus ja, du weisch also, wo du mich findsch, wükichi fründe händ es ganzes läbe mitenand." dänn hät mer nie grund, sich vo dem mänsch z entferne oder im herz untreu zwerde.. will mer weiss, dass de ander eim wüki liebt.

ich versuechs lieber so.. iifersucht empfindich au, klar, aber wänn ich en mänsch wüki lieb, dänn staat sis glück vor somene chliinliche ego-gfühl. und wänn die liebi wahr isch, dänn chunt de mänsch au immer wider zu eim zrugg.

und klar, min fründ mues di gliich iistellig haa, susch klappts nöd... zum glück zieht gliich und gliich sich aa..

also zwiebäckli, mir haltet eus gägesiitig ufem laufende, ok? imene jahr machemer liebesbeziehigs-bestandesuufnahm..

liebe gruess, au us höngg...

[Drachenherz]

Hmmm... Shmau, da fällt mir als Antwort eigentlich nur folgendes ein:

Wer loslässt, hat beide Hände frei zum Empfangen...

Börg, würd gern meh schriebe, han hüt aber en chnopf im Hirn.

Liebevolli Grüess
Drachi

[Kollegoli]

@shmau

S' isch nöd eifach, villich sogar unmöglich, 1 Person z finde wo all die erwartige chan erfülle. Aber das stört mich eigentlich garnöd... Die vorstellige und erwartige chömed hald vom Märliprinz/-prinzessin und mir läbed hald ide Realität und nöd imne märli. Muess mer denn immer alles ha? Chamer nöd au mal en kompromiss igah?

das findich eigentlich bis zume gwüsse punkt scho au so. ich han au kein stress und muss unbedingt sofort all mini vorstellige und träum erfüllt ha. eigentlich mussi die gar nie unbedingt erfüllt ha, well ich fühl mi ja mega guet so.

d'freiheit aber findi isch sehr wichtig. es söll eifach flüüsse und passiere und nöd dur igendwelchi kompromiss und ebe die vorstellige (zb. nur mir ghöred zunenand) beiiflusst werde (wenns dann mal so isch, dann isch au guet). das wär fü mich so was in richtig zrächtstuuche... me muss sozäge uswähle und ich find das söttme eigentlich nöd müsse. aso ich möcht das zumindest nöd.

öper hat mal zu mir gseit: "dliebi isch i dem wo liebt, nöd i dem wo gliebt wird". und ich muss säge, das isch verdammt wahr. wenn ich öper gern han, dann söll de dur mich nöd e ischränkig erfahre und wähle müsse. er söll frei sii und allne siine bedürfnis chönne nahgah. gnau so will ich au allne miine bedürfnis chönne nah gah. und ich denk, das isch sehr guet möglich; en kompromiss isch demnah nöd nötig und machts nur unnötig schwermüetig/unluftig/unliideschaftlich. seinzig was eus da im weg stah chönnt, isch euses ego und das möchti dem ganze nöd in weg stelle, well das eh zu nüt guetem führt.

[souris]

Lang lang hani überleit, sölli oder sölli nöd.. : ) ich tua jetzt glich...

Ihr schriebed dass seinzig was dem im Wäg staht, sini verschiedene "Bedürfnis" bi verschiedene "Partner" uszläbe ischs Ego... Aber es isch doch au es Ego-Thema dass ma das will.
Ich persönlich empfinde dia Vorstellig sehr 2 geteilt... uf ei siite denki klar, wieso nöd... vorallem wenns für beidi passt... Wenns eso wär, dass es einem vo beidne weh tuat, sich aber trotzdem druf ilah wür... Das stimmt für mich den eifach nöd.. Das isch i mine Auge nöd fair, nöd ehrlich... und i sonere Situation würi ganz klar säge, müasst ma abwäge was einem wichtiger isch...
Uf dia ander Site hani recht müah mit so öppisem... Es gaht ja um dia eigene innere Sehn - Sücht, wo befriedigt werde sötten... ma will nöd druf verzichte... Ich weis nöd, ob ma sich nöd au chli selber bschisst, wenn ma eifach für alli verschiedene "Bereich" en andere Partner hät... eine für Sex, eine für guati Gspräch, eine zum in usgang gah etc. (chli übertriebe gschriebe.... ) Irgendwia findi sött doch sZiel au chli sii, sich vo dene Sücht zlöse.. und vorallem findis na wichtig, au chli skämpfe inere Bezüchig. D.h. e funktionierendi bezüchig isch i mine Auge, dass ma gemeinsam nach Lösige suacht, dass ma gemeinsam wieder versuacht liedeschaft inezbringe und nöd eifach devolaufe und sich das bim nächschte hole... Öpper liebe heisst doch mengmol au verzichte.. nöd sich selber immer in vordergrund stelle...
Also für mi isch das au chli es "Ego-Problem"... Ich meine wenns nöd gaht, den gaz nöd, den muame sich trenne, aber sich alles chli warm bhalte und de füfer und Swegli... naja, ich weis nöd so recht....
routine tritt irgendwenn ih...glaubi au... Aber nur wenn mas zualoht.. In mine Auge veränderet sich doch Gedanke Welt vome Mensch laufend... Mer sind jede Tag so viel idrück, emotione usgsetzt, wia chama do dia geischtig Wält vom andere völlig kenne? Chönds nöd si, dass eifach sinteresse nüme so do isch nachere gwüsse ziit?
Mir stellt sich dfrag, und das nachdem ich min Kampf eidütig ufgäh han, Isch släbe, isch dliebe würgli e suachi wo endlos isch, e suachi wo sich nia beende laht, oder gits nöd irgendwo en mänsch, mit dem ma släbe teile chan... gits dia einzig wahri liebi und chan sich dia uf ein einzige Mensch bezüche oder nöd? Aber ich glaube es isch relativ sinnlos, sich da drüber gedanke zmache, well das wörd mah wohl erscht erfahre, wenn mas glebt hät...

[Melliandra]

Hm... isch no intressant. Beidi Sietene bezeichnet genau sGägeteil als Egoismus.

Eimal isch es egoistisch wenn mer de Partner für sich eleige wet und einisch,
wenn mer sich mehreri Lüüd für diversi Sache "halted".

Ich glaube, au da isch de Punkt wieder, wens passt denn passts. Schwirig
wirds wenn de einti vom eine red und de ander vom andere....

Für mich muess es eifacht im Mass sie. Wenn ich en Partner han, denn stimmt
das so wiet bi mier, dass ich nid no öber suscht fürs Bett bruch. Aber mal mitere
Kollegin in Ussgang und chli flierte, das set sicher dinne ligge, sowol bi mier wie
au bi ihm. Wie au halt mal en Party oder was fürs Ego absäge, wills halt de Partner
so wet, oder zB chrank isch. Ebe es gäh und es näh. Wenn das nümme klapped und
ich mich soooo starch zunere andere Person hi zoge fühle, denn chan das für mich
nümme Liebi sie. Denn hed mer de Ander no gern, oder mer fühlt sich wohl. Aber en
Liebes- Bezieig isch es für mich denn nümme.

Finde au, denn sett mer in sur Öpfel biesse und halt säge es isch verbie. Würd mer
nämlich suscht au biz so vor cho, wie de 5er und sWeggli, welle zha. sNeue ufregende
mit em chribele im Buch und körperliche kontakt und de Ander womer sich geborge fühlt,
weiss wies lauft, usw.

Ich glaub wenn jede ganz ehrlich isch, wett er sälber nid nur ufs einte oder andere reduziert
werde, sondern e Mänsch finde wo er zu dere Person und die Person zu eim sälber, beidi Teil
chand abdecke.

[souris]

@Melliandra

[Shmahu]

@souris und melliandra
ich red eigentlich nöd devo, verschideni partner für verschideni bereich zhaa, es gaat nöd drum sich öppis "warm zbhalte" und au nöd um d befridigung vo dringende sehnsücht, sondern ums eifach bedürfnis, eme mänsch wele nöcher zcho, wo mir öppis afangt bedüüte (wie sich das "nöcher cho" üsseret, isch e anderi frag). es hät i mine auge au nüt mit de qualität vonere beziehig ztue (oder de tüüfi vonere liebi, im gägeteil) wänn ich mich für en andere mänsch interessiere, wills um zwei ganz verschideni persönlichkeite gaat. hanich d milchschoggi weniger gern nur willi au no erdbeeri mag? gnüssich d uussicht ufen glitzernde bergbach weniger, nur willi au de ablick vom wiite meer atemberaubend find? sicher nöd, das hät ja nüt mitenand z tue...

iifersucht isch für mich dänn grächtfertiged, wänn ich min partner im stich lahn.. wänn ich mich nüme drum kümmere, wies ihm gaat und nur no uf mini bedürfnis lueg. das würi au als egoismus bezeichne.

mir läbed leider inere gsellschaft wo "eui" form vo beziehig d norm isch... somit sind immer die d übeltäter, wo fremdgönd oder scho gar nüme bereit sind, sich uf sone beziehig iizlaa.
es wird nie überleit, wie schmerzhafts chan sii, wämmer sich mues zwüsched zwei mänsche entscheide, obwohl das doch gar nöd nötig wär. wie schmerzhafts au isch, wämmer d liebi für en mänsch mues underdrücke, obwohl si mit de liebi für de partner gar nöd in konkurränz staat.

mis herz fühlt sich am beschte aa, wänn d liebi frei chan flüüsse. und ich lieb min fründ gad nomal meh defür, dass er mich da drin understützt..

[Melliandra]

@Shmahu

Ich han dini Meinig oder Läbenswies uf gar kei Fall verurteilt. Im gägeteil. Han nume feschtgstellt,
dass es intressant isch, dass das wo für de eint wahri Bezieig isch, für de Ander Egoismus isch und
umgekehrt.

Eini vo mine liebschte Mänschi läbt mit de gliche Istellig wie du und irgendwo dure bewunder ich
die Läbensistellig. Mier wärs schlicht und eifacht z'viel.

Wie gseid es isch mini Läbesistellig wo ich da obe gschriebe han. Und wie du ja sälber gschriebe
hesch, Iversucht giz au bi dier, du versuechsch eifacht mit dere umzgah. Das hani gmeint, wemer
halt merkt, dass de Partner plözlich no en anderi Person hed, wo ihn so mega flasht. Vo wäge nümme
"beidi Teil" chöne erfülle.

Es muess eifacht für beidi stimme und es freud mich das du öber gfunde hesch wo zu dier passt,
egal was für en Istellig du hesch.

PS: Was mich würd intressiere. Wens nid ums körperliche gad, was isch denn so anderscht wenn du öber
känne lernsch? Hm... wie seli säge.... also wenn ich en Ma känne lerne würd und er würd mich mega fläsche
und ich wet die Person umbeingt wieder gseh, ich glaub mien Kobold hät nüd degäge. Klar wenn ich denn
de Typ meh würd welle gseh als in, denn scho aber du seisch ja dass du dien Partner nid im "Stich" lasch, also
nid würsch vernachläsige?

[ZWIEBACK]

uiuiui, ihr hend ja fliisig gschriibe während ich am schaffe gsi bin.

@schmahu

jop, machemer! I eim jahr Libesbeziehigs-Brainstorming oder so! *lach*
...müend efach luege dasmer eus noed us de auge verlüred, mer weiss ja nie