Shmahu hat geschrieben:merci für euri antworte und euri guete gedanke!
@fallen angel: dasi d cd gmacht han, ja mit dem hani mer en traum erfüllt... und ich bsueche seminar, womich mega interessiered und wonich langsam mini bestimmig drin entdecke. aber je tüüfer ich i mini träum iegaa, desto schwiriger wirds, min alltag mit freud zmeistere.
@ogetron: sicher, es isch es problem vo de industriestaate... ich bin en teil devo und chan mich de konsequänze vo eusem läbestil nöd eifach entzieh. wäni mit eme buur us indie vergliich dänn bini für villes dankbar: fürd nahrig, fürs suubere wasser... für min job, wo mer freii wuchenänd und ferie schänkt. aber en buur in indie mues defür (nonig?) mit dem läbe, wo sich eus jede tag büütet: de zuckerguss wo über allem liit und d essänz verdeckt, bis mer nüme wüssed, um was s läbe eigentli gaat. um was gaaz??
@jürg: du häsch das sehr schön beschribe... dir gaaz gliich, was merki.
@oink und psymi und he: es gaat mir nöd um die truurige gsichter im tram. die hani akzeptiert. ich sälber richte min blick ufs positive im läbe und ich wür mich als glückliche und fröhliche mänsch bezeichne.
ich han au d gsellschaft als das akzeptiert, was sie isch. schwirig isch nur mini rolle i dem ganze.
es biispil dezue:
s vorletschte wuchenänd hani anere wunderschöne schwitzhüttezeremonie teilgno. ich han det mänsche troffe mit ufrichtie, offene herz... mänsche, wo sich nüme blände lönd vo all dene oberflächlichkeite, wo wänd tüüfer gaa.. wo sich wider wänd mit em herzschlag vo de erde verbinde.
s ganze wuchenänd hani eifach chöne sii, was ich bin: es chind vo dere erde, wo wott wachse, wo wott spile, wo wott sich und d wält will entdecke, wo will lerne und tanze und singe, wo s gschänk vo dem läbe will anä und witer schänke... ich bin eifach gsi. und es hät en uustusch stattgfunde zwüsched eus, jede hät vo jedem glernt, jede hät jede beriicheret. ich han mich bis i di letschti zälle durdrunge gfühlt vom läbe, wo öppis heiligem, gheimnisvollem, vome zauber.
am mäntig, zrugg im chinzgi wider de druck: d schuelpfläg wird hüt villicht en bsuech abstatte und mini arbet beurteile... en riise stress i mir, will ich das alles doch gar nöd will und chan, wo sie vo mir verlanged. ich will nüt wüsse vo sachkompetänz und graphomotorik... ich will, dass d chind chönd chind sii und mit mir durd wälder streife, mit stuunende auge. leider wird vo mir verlangt, dass ich d chind uf e wält vorbereite, wo sich nöd um d essänz i eus kümmeret, wo sich nöd um d liebi, ums grosse gheimnis dreit. wo eus vergässe laat, wer mir eigentlich sind.
nachere wuche bini jewiils fix und fertig...
isch das irgendwie naavollziehbar?
Giz für dich denn kei Möglichkeit, de Chind de Zauber vo de Wält doch bizeli
übere zbringe, i de gsteckte Norme, wo das Schuelsystem vor gid?
Isch nid genau das dKunscht vom Läbe?
Also verstah mich nid falsch, mini Elter sind beides Lehrer und ich weiss
wie schwirig alles isch, dass mer gschieder würd uf anderi Sache luege
bi de Chind, als nume läse, rächne und schriebe.
Aber irgendwie muess es doch en Wäg gäh, beides under ein Huet z'bringe....
Ich glaube ebe fescht drah, dass wenn ich das schaffe und mine Chind
chan wieter gäh, chömemer immer es Stückli nöcher a die "ander" Wält/Dänkenswies.
Es brucht eifacht Ziet, ich meine mier sind au nid vo Hüt uf Morn so worde
wiemer sind (Gsellschaft) also bruchts doch au Ziet zum wieter z'gah...
