Kein Bock....

[Fallen Angel 2]

@Anam Cara
yeah da stimm ich dir voll zue.

@Thema
ich glaube, wo das problem sin ursprung hät, isch im nadenke, und halt ebe zvill nadenke. wieso zvill? will wämmer alles "z'end" dänkt chunt mer zum schluss, dass es egal isch was du machsch us dim läbe oder i dim läbe, irgedwänn stirbsch und das wärs dänn gsi. oder es chunt öpper und macht zunichte was du ubout häsch. du chasch als mänsch zwei sache mache wo bestand händ: chind uf d'welt stelle - oder berüehmt werde, idem du d'welt veränderisch oder irgedöppis eroberisch oder e religion gründisch. alles andere, schaffe, usgang, karriere, hus boue und so wiiter isch meh oder weniger völlig sinnlos, wämmers mal so "im gesamtkontext" betrachtet. es isch aber sinnvoll (je nachdem) für dich als individuum. ich möchte mi nöd zwingend wiederhole, aber im prinzip isch alles wo mir mached wienes spiel. wie das brettspiel spiel des lebens, ganz genau so. um us dem spiel uszbreche, müsstisch scho öppis mega genials erfinde, mache oder erschaffe. drum isch kreativität, segs sounde oder schriibe oder male (also kunst) so ziemlich s'einzige wo dich vorneme völlig sinnlose läbe zumindest einigermasse befreye chan. was vermuetlich au de grund isch wieso dass das guet tuet. das isch au de grund, wieso es dich nöd erfüllt nur schaffe und party und das drü jahr lang hinderenand, irgedwänn chunt unweigerlich d'frag: und das wärs jetzt gsi? disere frag: und das wärs jetzt gsi, darf mer sich nur stelle, wämmer sich nöd vor de antwort schücht. d'antwort isch so in etwa: du chasch alles mache i dim läbe bisch absolut frei, chasch mache was au immer du grad willsch, alles hät konsequenze, es paar sache wirsch nöd chöne mache, will d'fähigkeit dezue nöd häsch - aber im grosse und ganze, mach was d'willsch. aber glaub nöd dass das "sinn" hät. usser für dich sälber, du gisch dir de sinn i dim läbe. de grund wieso chind glichvill wert sind wie e mega geniali erfindig wod mänsche wiiterbringt: wills au nach dim tod bestand hät. das wär aber au s'einzig, und wenn i 100 jahr en meteor uf d'erde knallt hät au das kein sinn gha. das alles isch "realistisch" und vermuetlich sogar wahr, aber das bringt dich nöd wiiter! du häsch das läbe nun mal, also versuechs z'gnüsse, versuech öppis z'erreiche, find öppis wo du chasch kreativ sii, und segs au nur en job. und hinderfrög nöd alles. wänn null bock stimmig ufchunt, sofort bekämpfe mit irgednere ablänkig. und segs so öppis wie tv luäge. glücklich wirsch nöd idem du irged e antwort findsch, uf all dini frage - glücklich wirsch nur idem öppis machsch. Du musch öppis "Tun", irgedwas, segs sport, segs game, segs party, segs kreativ sii, segs schaffe... nur nöd immer s'gliche... abwechslig isch wichtig...
und jetzt gründe mer e religion namens "Tun-ismus", werded berüehmt, riich, und chönd jedi frau poppe womer wänd.
wenn das keis erfüllts läbe isch

btw. chönt mich natürlich au irre

[Kollegoli]

aso ich finds lebe isch voll geil.

aso ich ha au es ziel. es ziel im lebe. soberschte ziel:

es geils lebe ha.

ich bin sehr beschäftigt demit, dem ziel nahzgah. und das isch voll geil.

eis ziel wo dem ziel diene söll, isch möglichscht geili musig zmache, fü mich.

möglichscht viel geili gfühl ha, das isch was alles sinnvoll macht. wenni mi mal scheisse fühl, dann isch das fü mich e zwüschephase zwüsche de guete gfühl. au wenn sie lang duurt. au wenni gliich viel scheissgfühl wie gueti gfühl han. ohni die schlechte gfühl gids au kei gueti gfühl.

und dann no chli advanced fü mich: d'gfühl usdrucke, in irgendwas. (be mir musig).
wenni es scheissgfühl han... so es richtig schlimms... unds schaff das usdrucke in musig oder im tanz zu geiler, das gfühl treffender musig, dann isch das was apokalyptisch geils. sverschissenschte gfühl isch dann zwar immer no uuherre verschisse. aber es isch dann guet so. und wenn mir dann träne abelaufed... es isch guet so und haltet mini inneri flamme am brenne und ich spühre wie ich lebe.

und wenns mal nöd so isch und ichs nöd schaff mich uszdrucke.. dann scheissdrauf. ich weiss ja dasses wieder besser wird. da bruuchts nur geduld. slebe wird mich scho füere und mir dann die gfühl bringe wo ich verdiene. und dankend nimmi jedes guete gfühl a. und au scheissgfühl, oder no schlimmer kei gfühl... dann bini bescheide und schrei nöd nach bessere gfühl... ebe ich chum scho das über wasi verdien (und je nach dem was ich gib und mach und tuen, verdieni halt meh oder weniger....)

[Kollegoli]

@fallen angel

aso gemäss miinere weltaschauig düütisch du "sinn" falsch. ich betitle dich jetz mal als apokalypsischt.

sinn isch doch nöd nur das, was dich überduured und mega für zuekunft isch.
es macht doch nöd nur sinn im lebe irgend e "riise mega maschine" zerfinde, wo dwelt rettet oder so.
mir sind da ja nöd sozäge e mänschheit wo e beschtimmti ufgab löse muess und dann hämers gschafft und es chunnt e göttlichi stimm wo seit "hagabagabuuu" oder so und dann chömemer irgendwie is "paradies" oder so. so wie es game wo musch fertig schaffe.

neineinei.

d'gegewart isch sehr sinnvoll. wenns sich geil afühlt, dann isch doch das sinnvoll !? wenn zruggblicksch uf dis lebe und dich a all die geil(scht)e moment erinnerisch... dann chasch doch nöd säge, dass das sinnlos gsi isch? fü das hat sichs doch glohnt? und demnah isches au nöd sinnlos gsi.. well es isch ja geil, und zum teil sogar orgasmisch geil gsi. so geil, dasses dich viellicht zu träne grührt hät, sdich gschuubed hät, du sgschafft häsch "mit de erde zschnuufe", dich häsch chönne mit eme andere lebewese synchronisiere oder es au eifach nur zu geilheit, freud und/oder liebi i jedem teil vo dim körper gführt hät.... das isch doch so geil, was wilsch no meh.
und de sinn vo dem ganze da, isch doch gnau no meh so sache zerlebe. möglichscht kollektiv. en ehrliche moment vo liideschaft isch eifach meeega starch, das isch eifach geil. nüt da mi münd maschinene erfinde für anderi oder so... neineinei, euses lebe macht scho für eus selber sinn.

es passends sprichwort:
irgendwie so: "schätze den augenblick, denn er ist der repräsentant einer ganzen ewigkeit!"

es isch doch eusi ufgab, ja sogar eusi göttlichi ufgab wenn so wilsch, für möglichscht viel geili augeblick zsorge und möglichscht viel geili augeblick zerlebe (was ja eh zämehängt). das isch öpis sehr sinnvolls und e wichtigi und allgegewärtigi uufgab. alles dreht sich nur um das. alles.
und indem ich en geile augeblick erleb, tuen ich au wie dvergangeheit wertschätze und ihre en sinn gäh. ich gib em eh scho sinnvolle lebe vo de "vergangene" mensche no es stückli meh sinn, well ichs i dem moment geil gha han und sie defür gsorgt händ.

und so wirds au wieder mit de zuekünftige mensche sii. indem mirs jetz geil händ und sache mached, demits mir und anderi geil ha chönnd (!), sozäge dgeilheit verbreitet, wird alles supersinnvoll. und geil. voll geil oder?

du gsesch also, ich find, dass mer sich da vo überhaupt nüt ablenke muess und scho gar nöd das slebe sinnlos seg. ma cha voll und ganz bewusst mit offne auge durs lebe laufe und alles au so aluege. und me chan ganz beruhigt sii.

[Anam Cara]

@fallen angel
Es hoch uf "tun-ismus" und d'wält gseht grad wieder chli "rosiger" us

@kollegoli
Ich dänke de einzigi sinn im läbe isch "läbe"..... doch wie und was und wo... isch jedem en andere weg dahingestellt....

"schätze den augenblick, denn er ist der repräsentant einer ganzen ewigkeit!"

wunderschön uf de punkt bracht, eigentlich gahts nur um die viele augeblick im läbe, wo im läbe teilwies e ewigkeit und schönheit gebed....

du gsesch also, ich find, dass mer sich da vo überhaupt nüt ablenke muess und scho gar nöd das slebe sinnlos seg. ma cha voll und ganz bewusst mit offne auge durs lebe laufe und alles au so aluege. und me chan ganz beruhigt sii.

ich glaube es isch schwirig mängisch de sinn unter all dene üssere iflüss no chöne zgseh und dementsprechend au denah chöne zhandle... voll bewusst und mit offene auge heisst für mich au glichzietig sehr viel schmerze erfahre und um die chunt mer i dem fall eifach ned ume.... umso ehrlicher du zu dir und de wält bisch um so mehr werdet dir d'auge au göffnet und oftmals gheit mer ines loch.... well mer eifach kei bock meh het das alles zgseh...
viellicht isch ja würklich alles nur istelligssach, merk ich ja sälber mängmal au, aber es git eifach momänt im läbe wo völlig sinnlos schiened, wo eifach voll kei bock hesch und am liebschte würsch schreie "Bitte haltet dwält a, ich will usstiege"
und i so momänt verspür ich absoluti unrue, unzfriedeheit und alli mini guete erfahrige und erkenntnisse bringed mer den irgendswie au nüt....
aber finde dini gedanke dezue eigentlich ganz schön und ok. nur, ich hans ächt chli ufgäh det dure und gsehne eus irgendswie eifach als sklave vomene system wo eus i jedem schritt und i jedere handlig verarschet und euse stutz, womer teilwies sowiso ned hend, wend abzocke.... uf das hani voll kä bock !!! aber anschienend muess mers akzeptiere, oder eifach ausstiege....

[wuchenendbefürworter]

@all: Merci für die zahlriche Antworte, isch doch scho Mal en deftige Ufsteller...
Nur hani müsse feschtschtelle, dass s Mitleidskässeli leider immer no leer isch, mueni halt no chli Geduld ha, bis i mis Autogramm chan irahme:-)

Nei ernschthaft:
Also das mit em tröime isch würkli e sehr gueti Sach, nur tröim ich scho fascht chli z gern. Debi vergiss ich ab und zue au chli d Würklichkeit, was dänn halt inere rechte Verstörtheit und Verschlosseheit zum Usdruck chunt. Am liebschte hani halt scho die "echte" Tröim bim schlafe, willi dert eifach inere andere Realität läbe und absolut frei bin. Logischerwiis mach ich mir immer mini Realität, aber während em wach sii isch mini Realität halt mit zimli viel Zwäng und Ischränkige verbunde. Genauso wie d Freiheit, womit ich bim eigentliche Punkt bin. Han i mir dine genau so es absoluts Freiheitsgfühl:

du chasch alles mache i dim läbe bisch absolut frei, chasch mache was au immer du grad willsch, alles hät konsequenze, es paar sache wirsch nöd chöne mache, will d'fähigkeit dezue nöd häsch - aber im grosse und ganze, mach was d'willsch

Bruch ich meh als e chli Nahrig, e chli Musig, e chli Schlaf, e chli Surstoff, es paar liebi Lüüt um mich ume, e chli Humor,usw...???
Han mer viel überleit öppis id richtig Selbstversorgig z mache... Wie ich sicher nöd würd usstige wär irgendwo uf d Strass go lebe, will dänn bisch genau wider Abhängig, eifach uf ne anderi Art.
Allerdings bin ich dänn doch zum Schluss cho, dass ich mini Schuel (Kanti) sött abschlüsse, dassi halt glich öppis ide Hand hät, wenni plötzli wider wett es "normals"Lebe füere. Gwüssi materielli Sache würdi sicher au vermisse, da mach ich mir nüt vor,ich bin zwar en Naturfründ, aber zocke halt doch ab und zue gern Mal chli bi Poker Stars oder luege en guete Fuessballmatch im Fernseh(Ja,ja ich schäme mich au defür...)

Woruf ich use will isch, dass ich han müsse feschtstelle, dass doch jedi Freiheit nur solang e Freiheit isch, wie si mit gwüsse Ischränkige verbunde isch, die absolut Freiheit, won ich mir vorgstellt han existiert nöd.

ja beschrib mal dini situation bitte.

Ich möcht ebe gar nöd e spezifischi Antwort uf mini Problem, dass halt ich für z egoistisch, will mer gseht ja, dass es andere da ihne genau so oder ähnlich gaht resp. gange isch. Chan dezue nur säge, dass ich en Art Menschephobie entwickled han. Wie meh bi mimbillige Joke gmerkt hät, hani Schiss, dass vili dänn nur s Gfühl händ, ich wott Mitleid errege..

Ich bin so eine, wo am Lebekän übergordnete Sinn git. Bin der Meinig, dass höchstens i chline Sache en Sinn bestaht:
Ich chan mim Lebe en Sinn geh dur bestimmti Mensche, dur Hobbys, ja unglaublech, aber selbscht dur d Schuel chani en chlinere Sinn im Lebe finde, au Musig mache oder mystischi Sache erlebe, "Ritual"durefüere, all die Sache sind chlini Sinn für mich. Allerdings han ich nöd s Gfüehl, dass die ganze Sachee grösseri Bedütig händ etz mal ufs gsamte Lebe gseh. Also suech ich gar nöd würklich en Sinn im Lebe, sondern meh Spass und Freud. Nur wie chame Spass und Freud ha wämmer öppis macht, wome gar nöd wott???

wenni es scheissgfühl han... so es richtig schlimms... unds schaff das usdrucke in musig oder im tanz zu geiler, das gfühl treffender musig, dann isch das was apokalyptisch geils. sverschissenschte gfühl isch dann zwar immer no uuherre verschisse. aber es isch dann guet so. und wenn mir dann träne abelaufed... es isch guet so und haltet mini inneri flamme am brenne und ich spühre wie ich lebe

Findi eigentli e gueti Istellig, nur isch das i dem Moment wos der würkli scheisse gaht eifacher gseit als gmacht.
Eigentli so chli ide Art vo ohni Nacht kän Tag, ohni Truur käi Freud, ohni Ernscht käi Spass....

[Fallen Angel 2]

Kollegoli du häsch ja recht, dass das was du beschriibsch geil isch und sich guet afühlt, aber es gah ja nöd um die moment wo alles superduper isch, und es gaht (mines erachtens) au nöd um es (bestimmts, definierts) problem, es gaht ganz allgemein gseit dadrum, dass du egal was du machsch, selbst wenn du wer weiss was machsch, sälbst wänn du nie öppis bewegsch, das (ebe eigetlich wie du seisch) nöd für öppis bestimmts machsch, du chunsch kei pünkt über für dis läbe, und sälbscht wänn doch - gitt ja lüüt wo das behauptet - so weisch du nöd was pünkt gäbt und was nöd. gits pünkt, wänn so und so vill minute glücklich oder fürsorglich gsi bisch? das isch nöd de punkt. de punkt isch, dass e kein punkt gitt i dem läbe gitt, es isch e linie, oder villicht eher e sinuskurve, wo kein afang und keis ändi hät. usser villicht de tod und geburt, okay, aber selbst das wird ja hüfig in frag gstellt. und dänn? häsch gläbt, bisch häppy gsi, bisch gemein gsi, bisch menschlich gsi, bisch berühmt gsi, bisch en looser gsi - wen interessierts?

nur dich selbst.

oh ja klar, mir sind ja kei egos, nei also mer interessiert sich ja schliesslich au für all die lüüt womer gern hät. oder sogar für die womer gar nöd kännt.. aber au das, was bringts? was bringt dir en job usser nahrig? was bringt dir en usbildig usser en bessere job? was bringt dir e frau? was bringts dir, was bringts dem planet?

im grund gno isch es völlig egal. das muss nöd negativ und au nöd akopalyptisch sii. es isch eifach. alles was passiert, passiert halt. shit happens. scheiss drauf...? bös gseit: wänns eh nöd druf a chunt, chasches ja au mitmache...

s'einzige was mir im läbe würklich händ isch euses läbe. das womer halt so erlebt. das was mer glaubt. das was mer azwiiflet. das was mer liebt.

mir alli lebed nach regle und gsetz, womir vo anderne, vo de history, vo eusne eigene gedanke, villicht sogar hormon, villicht sogar voneme göttliche wese vorgschribe oder i de natürliche genetik ineprogrammiert übercho händ. das isch ja wunderbar, nur FÜR WAS?

demit d'menschheit nöd usstirbt? oder demit mir immer erfahrener werded? oder demit d'schöpfig sich ständig reproduziert?

uf all die frage gits kei antwort, will d'frag nöd klar isch, will mir selber en teil vo dere matrix sind, wo eus umgitt. mir sind das programm. das wär öppe so wie wenn sich e filmfigur frögt, ob da no öppis usserhalb vo dem drehbuech isch. oder de pacman afangt alli muure niderriise. böh villicht gits ja no esone art dimension usserhalb vo dem was mir als realität känned. aber au wänns das gitt, was bringts dir wenn das usefindsch?

vermutlich eifach no meh frage. s'universum isch unendlich. unendlich i sine möglichkeite, und dänn doch wieder so gfange in ganz bestimmte abläuf.

schaffe oder jobs wo eim nöd gfalled sind nöd s'problem, liebeschummer isch nöd s'problem, glücklich sii isch au keis problem, s'problem isch churz gseit, dass es eifach so passiert. vor sich aneplätschered. das isch s'läbe.

s'guete da dra isch natürlich offesichtlich: wänn nüt würkli wichtig isch, dänn chasch du völlig befreit vo dem ganze balast vom müsse und chöne läbe. es isch halt so wies isch, also scheiss drauff und läb's. und mach öppis drus oder lahs bliibe, das blibt dir überlah. es gitt kei pünkt. und wenn doch, dänn bisch halt erschte worde oder letzte oder irgedwo dezwüsche. au das isch im grund gno völlig egal.

aber: dennoch gits natürlich so was wie liebi, menschlichkeit, freud, glück, hoffnig, truur, melancholie, und so wiiter. das alles sind die farbe im läbe. und mit dene farbe chasch du dir dis eigene lebens-bild male, dis läbe gestalte, kreiere und erschaffe.

und ufenart isch da villicht de sinn, wo eim hilft, dass es ein nüme so aschisst.

@wuchenändbefürworter
de menschephopie hani au es ziitli lang gha, sogar rächt lang. ich ha - au wänn das jetzt wieder chli "rosarot" tönt - dur goapartys und durs gschäft glernt mich wieder chli meh z'öffne. zwei zimlichi gegesätz woni ächt brucht han. die erschte zwei partys sitt langem händ sich fascht no schlimmer agfühlt, als dihei zbliibe. aber dänn so mit de ziit hani mi wieder chli göffnet, dänn echli meh.. und eines tages bini sogar ade punkt cho, woni gern mal dihei blibe bin, nöd us flucht, sondern als en entscheidig. es gitt sicher keis patentrezept um us soneme phobische zuestand usezcho. aber ufenart isches villicht eifach s'läbe oder das was mer so macht, wo ein wieder "uselockt" und irgedwänn die andere mänsche wieder gern ha laht. ich bin no lang nöd a dem punkt, woni vo mir säge, ich seg en offene mensch, ganz sicher nöd, und doch wänni so die letzte 5 monat aluäge hani mich diesbezüglich scho chli gmacht. mängmal au übertriebe. aber au das ghört dezue.. was mir jedefalls immer ghulfe hät sind so sätz wie, "es sind eifach mänsche, genau wie du, ticked genau glich, und doch ganz andersch". villicht hilft dir de satz ja au es bizeli.

[Titali]

ich kenne das problem zu guet.... ich bin au sehr lang go reise, welli eifach us dem ganze chueche mal han müesse use gseh... und bim reise lernsch du dich uf e ganz neui art und wies kenne.... und du heschs gfühl du wachsisch und entwicklisch dich ..... und du gsehsch uf eimal so viel möglichkeite... aso mir hets mega guet due, eifach vo de hufe erkenntniss und erfahrige wo du machsch
aber woni zrug cho bin isch irgendswie alles no glich gsi wo rund um mich ume gsi isch und das het mi irgendswie sehr erschrekt und ich ha angscht gha, was ich jetz mit all dem wo ich erläbt han söll afange.
ich han gwüsst was i ned will, aber ebe ned würkli was i will..

i got the same experience!!!
öpis vom schlimmste isch für mich när gsi, all die wundervolle erinnerige mit niemer richtig könne teile, wüe doch die meiste i andere länder oder städt wohne, wo ich uf reise bin zämegsi...bin ou geng voller tatendrang und nöi idee heicho, aber tage, wuchene und mönet sind vergange und dr alltag het mich wieder ufgfrässe und dr trott und stress vor westleche wält klopft a tüüre ... vergangeheit holt eim i und die alte gwohnheite sind glich ou geng no hie! das alles isch wohl au en grund, dass ich immer und immer wieder bin gange go reise...und ich wirde wohl ou nid dermit chöne ufhöre...

schön die erfahrige chöne zteile

du chasch als mänsch zwei sache mache wo bestand händ: chind uf d'welt stelle - oder berüehmt werde, idem du d'welt veränderisch oder irgedöppis eroberisch oder e religion gründisch. alles andere, schaffe, usgang, karriere, hus boue und so wiiter isch meh oder weniger völlig sinnlos, wämmers mal so "im gesamtkontext" betrachtet.
und jetzt gründe mer e religion namens "Tun-ismus", werded berüehmt, riich, und chönd jedi frau poppe womer wänd.
wenn das keis erfüllts läbe isch

btw. chönt mich natürlich au irre

es het doch jede e anderi bestimmig und berufig im läbe! es isch nid jede für grossi tate gebore i däm läbe ... so het jede sin wäg und sin ufgäbe und es rücksäckli voll mit wärkzüg... es het ou nid jede die gliche ziel und bedüfniss um zfriede und glücklech zhie!

aber eis heimer alli glich: lerne wer-du-wirklich-bist - denke, sprich und handle... träume - erkenne und verwirkliche...


und zu dim "Tun-ismus" ehm sex-ismus *hahaha* wo bliebt do zwohl und bedüfnisse vo de froue??? ich gründ dr göttin-ismus, wo froue no froue chöi sie *bääääh*

so, mues höööre... gähn und guet nacht...chönt no meh schriebe, aber tooo tierd!

[Fallen Angel 2]

@Titali
mir gahts um folgendes: wänn du nüt machsch, dänn fühlsch di nöd wohl, dänn isch's läbe farblos und langwiilig, und ödet ein aa. und wieso? will mer s'gfühl bechunt, dass es kein sinn ergitt. du seisch jede hät halt anderi ufgabe, aber was machsch wänn 70 bisch und s'gfühl häsch hegsch nie gläbt? das isch sicher nöd s'ziil im läbe. obwohl jedes ziil im grund gno nur für dich es ziil cha sii. und villicht isch es ja au nur e usred zsäge es cha halt nöd jede dis oder jenes. villicht chömer vill meh als mer meined. wämmer dra glaubed, öppis z'chöne. wämmer alli möglichkeite uslooted. aber das gaht jetzt scho wieder i sone philosophischi richtig, womir irgedwie nöd in kram passt. an und für sich gahts um das gfühl vom null bock haa und was mer degäge cha mache. du schriibsch hüfig, mer müssi halt erscht mal a sich schaffe, dänn erscht chammer irgedwas mache. aber villicht isch das ja au en irrtum, villicht chammer nur dänn öppis erreiche, wämmers eifach mal macht. damit isch im übrige nöd sex gmeint *lol* au wänn klar isch, dass vo all dem woni gschribe han, de spruch s'einzige isch, wo mer cha druf umehacke. aber hey, es isch nur en spruch, wer sarkasmus findt dörf ihn bhalte... es gaht aber nöd um de scherz - sondern um d'frag was du chasch mache, um i dim läbe zfridener und glücklicher, und villicht sogar erfüllter chöne z'sii. wötsch dis läbe lang lerne und a dir schaffe - oder wötsch au eifach mal läbe und das gnüsse? all das woni gschribe han, isch natürlich au eifach en bewiis, dass mit naadenke nur eis erreichsch: meh frage. und no meh. sogseh: "tunismus" naja, so blöd isch das gar nöd. dänk nöd drüber na warum das läbe so isch, sonder akzeptiers eifach als das was es isch: läbe. wobii, ich selber bin ja sogseh wiit devo entfernt nöd so vill nazdenke. also mussi wohl doch no chli a mir schaffe, hm? *grins* nei, ich glaubs eher nöd, will solang ich "a mir schaffe" wirdi nie all das erreiche woni chan. will ich mich dadurch ständig nur mit mir beschäftige, statt mit all dem was suscht no so abgaht, oder abgah würd, wänni nöd ständig uf de suechi nach öppisem wär, woni no muss erreiche oder so. im prinzip hani scho alles. umsetzig und handlig isch das wo fehlt. nei nöd mal "umsetzig" das isch scho wieder vill zfescht in richtig psychologie - sondern au eifach: TUN. irgedwas und segs go jogge, segs schriibe, segs schaffe, segs shake, segs rede. segs sex, hehe

[Catweazle]

sobald me nüt macht chunt eim släbe sinnlos ine. das seit eim s unterbewusstsi. dan mues mes ustrickse, und aneluege und gse ich mach ja grad öpis. segs hocke laufe esse und und und. du chunsch aber immernonig uf de punkt vo dim aschiss. wo das er hockt. lueg ane und finds use

[Titali]

@angel:

um das geht es doch angel:

villicht chömer vill meh als mer meined. wämmer dra glaubed, öppis z'chöne. wämmer alli möglichkeite uslooted.

die meisten menschen glauben, sie können nicht viel und sehen kein sinn im leben, jedoch der sinn im da-sein muss jeder selber finden... den schneit es dir nicht einfach so ins hirni, darum wächst du und erwachst mit jedem neuen tag, mit jeder neuen handlung und mit jeder neuer erfahrung und findest ein kleines stück näher zu dir-selbst!
jesus sagte bereits: "Was ich kann, könnt ihr auch!" (irgendwie eso, und das stimmt)!

wann fängt man an sein leben zu ändern?

dann wenn du sooo unzufrienden, so unglücklich, traurig und die null-bock-stimmung nicht aufhört, dann kannst du was ändern... ich muss immer zuerst im schwarzen dunklen loch ganz unten sein, bis ich es nicht mehr ertrage und dann steige ich empor wie der phönix aus der asche und erstrahle im neuen glanz und erhalten kraft und zuversicht, dass ich wieder auf den richtigen weg komme und kann vieles umsetzen, dass mir dann wieder wert und zufriedenheit gibt!

warte nicht bis du 70 jahre alt bist!!! wenn ich meine grossmutter im alterheim besuchen gehen, mir grault es jedesmal... so will ich niemals enden... das leben nicht verstanden, nicht gelebt und jetzt keine ahnung vom tod zu haben und die angst mir ins gesicht geschrieben, weil ich nicht weiss, wann der tod an die türe klopft, mich mitnimmt, aber wohin???
(i know it for me)!

du schriibsch hüfig, mer müssi halt erscht mal a sich schaffe, dänn erscht chammer irgedwas mache

ja das meine ich auch so! man sollte sich nicht auf andern ausruhen, weil das führt zur abhängikeit und was tust du, wenn er/sie weg ist?
dann bist du ganz tief tief unten und kannst wieder von vorne anfangen zu lernen mit dir alleine auszukommen... darum jeh früher du lernst mit dir alleine klarzukommen und zu lernen, wie du tickts umso eifacher wird das leben dir erscheinen und geschehen!

was mir persönlich ganz viel viel gebracht hat zur persönlichkeitentwicklung waren spirituelle kurse und auch therapien... hab x davon hinter mir und es brachte mir sehr viel und traff wunderbare menschen, fühlte mich endlich verstanden und entdeckte mich neu!
aber der beste meister für einen lehrling sind die erfahrungen die das leben prägen und den kontakt zu seinem höheren selbst und zu seele zu finden, weil dort wirst du finden und hören, was für dich bestimmt ist!

so genug jetzt, sonst schweif ich ab in meine alten esotherischen verstrickungen

noch was, ich ha das dänk als witz gmeint wäge dire religion... weiss dänk scho, was du gmeint hesch, aber ha nur wöue säge, dass sone religion rächt männlech prägt isch - isch wie ALLI!!! drum ha ich schnäu gägewicht, balance müesse mache *hahahaha* bin chli allergisch@religionen!

schöne tag...

[Fallen Angel 2]

@Titali
tjo, also im grosse und ganze häsch du recht, mit dem wo du da schriibsch. insbesondere de teil:

dann wenn du sooo unzufrienden, so unglücklich, traurig und die null-bock-stimmung nicht aufhört, dann kannst du was ändern... ich muss immer zuerst im schwarzen dunklen loch ganz unten sein, bis ich es nicht mehr ertrage und dann steige ich empor wie der phönix aus der asche und erstrahle im neuen glanz und erhalten kraft und zuversicht, dass ich wieder auf den richtigen weg komme und kann vieles umsetzen, dass mir dann wieder wert und zufriedenheit gibt!

wo ich nöd so ganz de gliche asicht bin, isch, dass mer quasi unfähig isch, e bezihig iizgah, en neue job azfange, für öpper da sii und so wiiter, bevor mer nöd "a sich gschaffet" hät. zwar stimmts scho, wenn du ineme reine abhängigkeitsverhältnis lebsch und dänn det wieder usegworfe wirsch, fangsch sozsäge wieder bi null aa. aber ebe doch nöd ganz bii null. will au die abhängigkeitsbezihige, oder jobs wo dir überhaupt nöd ligged, lehred dich öppis, und sind somit "berechtigt" i dim persönliche läbenslauf. klar, mer seit no oft, "oh hätti doch nöd" aber DASS mer das CHAN säge, liit villicht ja au grad a dem, dass mer's halt ebe gmacht hät.

sicher sind büecher, therapie, naturheilpraktiker, job-beratigsfirmene, schuele und all das züg hilfriich um dich z'unterstütze, dir neui perspektive z'zeige. nur irgedwänn musch dich dem läbe au mal stelle. und halt säge, ok, jetzt versuechemer die theorie mal umzsetze. mängmal klappts - mängmal nöd. würkli tragisch isch das aber au nöd.

solang mer de muet nöd verlürt. oder d'fähigkeit als phoenix wieder uf'zerstah. solang mer nöd chronisch (unbegrenzt) depressiv wird, oder falsche überzügige nagaht, z.B. "ich find eh nie" "ich bin halt so" "ich cha au nüt dra ändere" - will wämer sonen spruch erscht mal verinnerlicht hät, wirds sack schwer de wieder loszwerde.

ich find de catweazle bringts uf de punkt: "sobald me nüt macht chunt eim släbe sinnlos ine" - das nennt mer Lethargie. Und Lethargie isch Gift für's persönliche Wohlbefinde. Und natürlich au für alles womer im läbe erreiche möcht.

[Titali]

wo ich nöd so ganz de gliche asicht bin, isch, dass mer quasi unfähig isch, e bezihig iizgah, en neue job azfange, für öpper da sii und so wiiter, bevor mer nöd "a sich gschaffet" hät. zwar stimmts scho, wenn du ineme reine abhängigkeitsverhältnis lebsch und dänn det wieder usegworfe wirsch, fangsch sozsäge wieder bi null aa.

hehe angel, ja hesch scho rächt, weiss was du meinsch!

meh lernt mega viel vonang und äbe über sich sälber, ob das ire fründschaft oder ire partnerschaft isch...

jajajajajajajajajaja!!!

aber meh mues ou bereit sie derfür wenns würklech umene liebesbeziehig geit, schüsch ardet die beziehig imene chaos, drama oder terror us!!! meh mues ja ou nid geng grad vo beziehig rede, wenn zwöi sich finde, sondern eifacht zäme en wäg beschrite, wo sich irgendeinisch wieder trennt!!!

sind allti gwohnheit vo mir mit dere predigt, aber ha mich scho afo ändere und göffnet

wäge job und so... jede job git eim öpis ou wenns nur erkenntnis isch gsi, dass meh dä job nieme macht, wües eim würklech nid liegt... wenigschtens weisch denn, was nid wotsch!

[Anam Cara]

@titali

ebefalls guet zwüsse dases no anderi mänsche git mit dene erfahrige..... s'einzige bi so reiseerfahrige isch, du chasch sie idemsinn mit niemertem teile usser dir und all dene mänsche wo du begegnet bisch... Aber ned mit dene mänsche wo di verbunde oder dene du dich eifach total nöch fühlsch.... irgendswie hani au realisiert, das eigentlich schönschte im läbe s'teile isch, egal was du teilsch, hauptsach du teilsch es... materielli sache, wie seelischi erfahrige oder erkänntniss.... ha irgendswie bim reise serscht mal so viel zämehäng und würklichkeite erfahre... und wünschti das mit de ganze wält chöne zteile.... aber es isch scho wahnsinnig schwer gsi, immer no das gfühl i dim herz izschlüsse und ned zverlüre...
ich glaube erscht den, wenn mer würklich mit sich elei isch und sich uf niemert andersch chan stütze, lernt mer sich au würklich kenne... anderersits bruched mir mänsche um eus ume, susch sterbed mir (glaub ich zumindescht)... schliesslich wend mir eus mitteile und ustusche und enand verstah und kenne lehre...
das null bock thema, isches wichtigs abschnittli i eusem läbe und jede mänsch findet irgendeinisch use, wie er mit dem cha lerne umgah, viellicht gits au vieli verschiedeni weg für öper ... für öper anderscht wiederum nur beschränkti wege....
schlussändlich glaub ich so null bock täg wünsched sich eigentlich nur e bewusstsins erwieterig... oder chli me zueneigig zu dim herzli... wie au immer....

[The Dude]

Was, wenn man nicht mal mehr Bock drauf hat, Bock zu haben?

Mit Sicherheit sollte man in so einem Falle kein Ziegenhirte werden...

Ohne Bock auf irgendwas, gibts jedenfalls garantiert keine Zicken... ^^



Ps. Man sagt doch geläufigerweise, kiffen mache gleichgültig, aber was, wenn man noch nicht mal mehr Bock zum Kiffen hat, und es einem voll nüchtern völlig scheissegal ist? ^^





EDIT: Achja, um noch kurz zum Verlauf Stellung zu nehmen... Mit Sinn haben Böcke mE. nix zu tun, zumal man vollerfüllt sein kann von Sinn, und damit, erst recht, alle Böcke dazu bringt, das Weite zu suchen... ...oder anders gesagt. Eine sinnerfüllte Bocklosigkeit oder eine bocklose Sinnhaftigkeit par excellence...

EDITH II: Was auf alle Fälle bei sinnentleerter Bocklosigkeit hilft, ist, wenn man saftige Weiden bereitet. Auch wenn die Böcke womöglich vorerst noch bocken, werden sie früher oder später, so stur sie auch sein mögen, zurückkehren nach Graubünden, und sich am saftigen Klee laben...
Dumm nur, dass dann wohl alsbald auch wieder Zicken folgen...

EDITH III: Was'n Bockmist - ich scheiss den Stall voll

[Pufflibäng]

Geht nicht, gibts nicht!